Fréttir

Við frestuðum útivistardegi 4. september vegna veðurs en nú er hann kominn á dagskrá næstkomandi föstudag, 18. september. Nemendur skólans munu þá njóta útivistar og hreyfingar þennan dag og fá foreldrar nánari skilaboð um það frá umsjónarkennurum. Veðurspáin er góð og vonumst við til að við getum notið veðurblíðunnar.

Nemendur Giljaskóla tóku þátt í Ólympíuhlaupi ÍSÍ í gær. Með Ólympíuhlaupi ÍSÍ er leitast við að hvetja nemendur til að hreyfa sig reglulega og stuðla þannig að betri heilsu og vellíðan. Gátu nemendur valið að hlaupa 2,5 km, 5 og 10 km. Með hlaupinu er fyrst og fremst lögð áhersla á holla hreyfingu og að allir taki þátt. Til að skapa góða stemningu var tónlist spiluð við skólann og boðið upp á ávexti. ÍSÍ mun senda nemendum viðurkenningarskjal á næstu dögum.

Kolfinna Stefánsdóttir nemandi í 6. bekk var tilnefnd fyrir smásöguna "Jólasveinar í sumarfríi" á Sögum, verðalaunahátíð barnanna sem fram fór í Borgarleikhúsinu sl. laugardag 6. júní. Alls bárust um 100 sögur í keppnina og voru 20 tilnefndar af þeim. Allar sögurnar sem voru tilnefndar voru gefnar út á rafbókinni "Risastórar smásögur" á vegum Menntamálastofnunnar. Tengil á bókina má finna hér https://vefir.mms.is/flettibaekur/namsefni/risastorar_2020/ Og hér er svo ein mynd af henni með viðurkenningarskjalið sitt. Innilegar hamingjuóskir Kolfinna :)

Skólaslit verða með þeim hætti að 1. - 9. bekkur kemur saman í íþróttasal skólans kl. 10.00 föstudaginn 5. júní. Að því loknu fara nemendur með sínum umsjónarkennurum í stofur, fá námsmat og kveðja. Gengið er út frá því að skólaslitin taki um klukkustund. Vegna samkomutakmarkana þurfum við að hafa athöfnina að þessu sinni án foreldra.

Næstkomandi föstudag ætlum við að taka þátt í UNICEF hreyfingunni. Markmið UNICEF-hreyfingarinnar er að fræða börn um réttindin í Barnasáttmálanum og virkja þau til samstöðu með jafnöldrum sínum um allan heim. Þá munu nemendur skólans hlaupa/ganga stuttan hring í hverfinu. Hver og einn nemandi fær heimspassa og í hann safnar hann límmiðum fyrir hvern hring sem farinn er. Samhliða geta nemendur safnað áheitum frá fjölskyldu og ættingjum fyrir hvern hring sem þeir hlaupa/ganga. Nemendur fá allir upplýsingabréf um viðburðinn ásamt áheitaumslagi. Áheitin eru algjörlega valkvæð og munu allir nemendur taka þátt í að fara hringinn og fá viðurkenningu á hverjum förnum hring.