Af hverju foreldrarölt ?
Fyrst og fremst vegna þess að okkur er ekki sama. Við viljum varna því að börnin okkar lendi í vanda. Við viljum líka koma í veg fyrir hópamyndanir eftir lögleglan útivistartíma. Nærvera fullorðinna þar sem börn hafa safnast saman hefur róandi og fyrirbyggjandi áhrif. Líkur á að börnin okkar lendi í aðstæðum sem ógna þeim eða hræða minnka þegar fullorðnir eru nálægir. Nærvera fullorðinna gefur börnunum tækifæri til að leita aðstoðar ef á þarf að halda.
Af hverju þú ?
Langflestir foreldrar standa vel að sínum börnum og þeir eru ekki úti eftir að lögbundnum útivistartíma lýkur. Margir spyrja því hvers vegna þeir eigi að fara út af heimilinu frá sínu barni til að passa annarra manna börn? Með því að taka þátt í foreldrarölti höfum við áhrif á hverfisbraginn og það félagslega umhverfi sem við og börnin okkar búum við. Því færri sem nota vímuefni, eru lagðir í einelti eða beittir einhvers konar ofbeldi, því betra og öruggara er umhverfi okkar. Við berum öll ábyrgð á okkar nánasta umhverfi og eigum að sýna þeim sem eiga í vanda að okkur er ekki sama. Auk þessa kynnumst við fleiri foreldrum, við höfum gott tækifæri til að ræða sameiginleg áhugamál og, síðast en ekki síst, við eigum saman ánægjulega stund á heilsubótargöngu um hverfið okkar!
Fyrirkomulag foreldraröltsins
Fyrirkomulagið er þannig að fulltrúi úr foreldrafélagi Giljaskóla mun hafa samband við bekkjarfulltrúa í þeim bekk sem á að sjá um að manna röltið hverju sinni. Bekkjarfulltrúar hafa samband við foreldra í bekknum og tryggja að lágmark fjórir foreldrar komi til með að rölta. Mikilvægt er að allir viti af röltinu í tima til að vel takist til.
Mæting á röltið er við Giljaskóla. Þeir sem rölta skulu aldrei vera færri en þrír. Röltarar fara um hverfið fótgangandi (geta skipt liði en samt alltaf lágmark tveir saman) og líta eftir hvort ekki sé allt með felldu, engin samansöfnuður barna eða unglinga á að eiga sér stað eftir lögboðinn útivistartíma.
Skipulag foreldrarölts í Giljaskóla er sent á bekkjarfulltrúa
Yfirleitt er miðað við að rölt verði einu sinni í viku þriðjudag eða fimmtudag (þá daga er opið hús) frá kl. 21:30 – 22:30 og þau föstudagskvöld þegar böll eru í skólanum þá er rölt frá kl. 23:00 - 00:30.
Útivistarreglur frá 1. september – 1. Maí
6 – 12 ára börn mega vera úti til kl. 20:00
13 - 16 ára unglingar mega vera úti til kl. 22:00
Skipulag foreldrarölts Giljaskóla skólaárið 2022 - 2023
Áríðandi er að skila skýrslu um röltið, hún þarf ekki að vera löng. Hver hópur skilar skýrslu rafrænt:
Rafræn innfyllingarskýrsla
Hvernig á að hegða sér á foreldrarölti ?
- Við eigum að sjást. Við eigum að vera í endurskinsvestum sem eru í sérmerktum kassa upp á skógrind við aðalinngang Giljaskóla. Skila vestum aftur í gegnum póstlúgu eftir göngu.
- Við eigum helst ekki að vera færri en fjögur saman, en röltum þó einhvern vanti.
- Við röltum um hverfið og erum sýnileg.
- Við höfum afskipti af börnum og unglingum sem eru einir úti eftir útivistartíma. Bendum á regluna og ef þau fara ekki sjálfviljug heim þá má hafa samband við lögreglu.
- Við ræðum ekki málefni einstaklinga sem við mætum á foreldrarölti við óviðkomandi.
- Við þurfum að vera til taks ef börnin þurfa á okkur að halda.
- Við þurfum að geta hlustað og leiðbeint án þess að stjórna.
- Við hringjum á lögreglu (112) ef upp koma árekstrar, ofbeldi, slys, vímuefnaneysla /-sala eða annað sem krefst afskipta. Tökum fram að við séum foreldrar á rölti.
- Vert er að gefa bílum gaum sem þið teljið tortryggilega, það gæti verið vísbending um landa- og fíkniefnasölu. Skynsamlegt er að skrifa niður bílnúmer og setja í skýrslu. Þeim upplýsingum er komið áfram til forvarnardeildar lögreglunnar.
- Við erum ekki lögreglan! Við ætlum að sýna börnunum að okkur er ekki sama um þau.
Tengiliður stjórnar foreldrafélagsins: Ingimar 8622173
Tengiliður skólans: Ella 8673935
Tillaga að tölvupósti frá bekkjarfulltrúum til foreldra
Sæl og blessuð
Foreldrarölt okkar bekkjar er (tilgreina tíma), við þurfum að vera a.m.k. fjögur í hvert skipti. Vinsamlegast skráið ykkur í þetta rafræna skjal.
Það er mæting kl 21:30 í Giljaskóla og eru vesti í sérmerktum kassa á skóhillu við aðalinnganginn. Eftir gönguna má setja vesti inn um póstlúguna á skólanum.
Eftir röltið er mikivægt að einn úr hópnum geri skýrslu með því að fara á þessa síðu Rafræn innfyllingarskýrsla og segið frá í örfráum orðum hvernig röltið gekk svo foreldrafélagið geti fylgst með og komið málum áfram ef þess þarf.
Bekkjarfulltrúar sjá um að manna foreldrarölt og hvetja foreldra til þátttöku. Ekki er ætlast til þess að bekkjarfulltrúar sjái einir um að rölta.
Kær kveðja
Bekkjarfulltrúarnir
XXXXXXX (mamma XXXXXX) og xxxxx (pabbi XXXXXX)