Fréttir

Síðustu þrjá daga hafa staðið yfir skemmtilegir og lærdómsríkir þemadagar í 1. - 7. bekk. Ákveðið var að taka sjálfbærniþemað sem stendur nú yfir enn lengra og flétta við vísindi og sköpun. Nemendur unnu í aldursblönduðum hópum á ólíkum stöðvum, þar sem þeir m.a. lærðu um endurnýtingu og neyslu. Svo fengu allir nemendahópar þá áskorun að brjótast út úr "Break out herbergi" með því að leysa þrautir sem tengjast viðfangsefninu. Nemendur útbjuggu mylluspil úr steinum, veggteppi um sjálfbærni og stóra mandölu á vegg til að setja í jógarýmið. Einnig mátti sjá nemendur gera stuttmyndir um sjálfbærni og fara í spennandi vísindaverkefni með heimatilbúnum eldflaugum og bílum. Nemendur virtust njóta sín vel í námi og leik undanfarna daga og vonandi sjáum við árangur í aukinni umhverfisvitund í framhaldinu.

Fimmtudaginn 22. september var allt starfsfôlk Kiðagils og Giljaskóla hvatt til að ferðast til og frá vinnu með umhverfisvænum hætti í tilefni af bíllausa deginum. Flest starfsfólk tók áskoruninni fagnandi og skildi bílinn eftir heima. Nemendur 6. bekkjar gáfu því starfsfólki heilsudrykk og hrósmiða að launum.

Í morgun drógu nokkrir nemendur regnbogafánann að húni hér við Giljaskóla. Regnbogafáninn er táknrænt merki þess að við fögnum fjölbreytileikanum og viðurkennum ólíka einstaklinga. Á vefsíðu hinsegindaga segir: Frá því að regnbogafáninn varð að tákni í baráttu hinsegin fólks hafa margir aðrir gert fánann að tákni sínu. Gilbert Baker, hönnuður fánans, hefur sagt í fjölda fyrirlestra að fáninn sé eign allra sem berjist fyrir mannréttindum hvar sem er í heiminum.

Skólaslit 1. - 9. bekkjar og sérdeildar: Nemendur mæta í íþróttasal Giljaskóla kl. 9:00 en fara síðan í stofur til að kveðja samnemendur og umsjónarkennara. Foreldrar / forráðamenn eru velkomnir. Útskrift 10. bekkjar: Útskrift 10. bekkjar verður í íþróttasalnum kl. 16:00.

Að undanförnu hafa nemendur 5. bekkjar verið í spennandi verkefni þar sem þau samþætta nám í stærðfræði, sköpun, náttúrufræði og grenndarnámi. Krakkarnir byrjuðu á að fá fyrirmæli um hvernig hyrning þau áttu að gera. Þau teiknuðu hann á blað og mældu ummál og flatarmál. Þau fengu síðan að vita hversu djúpt steypumótið átti að vera og þá gátu þau reiknað rúmmálið. Nemendur útbjuggu síðasn steypumót. Þeir steyptu síðan hellur, skreyttu þær og gerðu eldstæði í skógarrjóðrinu okkar. Samhliða þessu var unnið með náttúrufræði, nemendur hlustuðu á stutt podcast um hvaða dýr lifa í skóginum. Krakkarnir gerðu svo allskonar hús fyrir dýrin í rjóðrinu. Vinnunni lauk með því að leira dýr og skrifa um þau sögu. Við hvetjum nemendur til að bjóða foreldrum með sér í göngutúr í rjóðrið til að skoða afraksturinn!

Eins og fram kemur í öryggisáætlun Giljaskóla ber okkur að æfa rýmingu á skólahúsnæðinu með reglubundnum hætti. Í vetur höfum við verið að endurskoða rýmingaráætlun okkar og í kjölfarið höfum við haldið tvær rýmingaræfingar með stuttu millibili. Æfingarnar gengu afar vel og tekur stuttan tíma að rýma húsnæðið þar sem starfsfólk og nemendur kunna sitt hlutverk vel.

Nemendur á mið- og unglingastigi hafa undanfarna daga verið að mála ýmis form á skólalóðina svo hægt sé að vera í ýmsum skemmtilegum leikjum, s.s. pókó, twister og parís. Svo hafa þau útbúið langa og flotta þrautabraut. Það eru list- og verkgreinakennarar sem hafa aðstoðað þau við verkið og Slippfélagið styrkti þau með skærlitaðri málningu. Sjá má fleiri myndir á Instagramsíðu sjónlista Giljaskóla

Þann 28. apríl kom góður gestur í sérdeild Giljaskóla. Hann heitir Piotr Loj og erindi has var að færa deildinni sýndarveruleikagleraugu frá Góðvild og Virtual Dreams Foundation. Í heimsókninni kynnti hann þau tækifæri sem gleraugun geta skapað, fræddi starfsfólkið og kenndi á gleraugun. Við erum öll afar þakklát fyrir þessa rausnarlegu og góðu gjöf sem býður upp á margt skemmtilegt og spennandi og endalausar upplifanir. Það er frábært að fá tækifæri til að nýta þessa einstöku tækni fyrir nemendur okkar.