Fréttir

Mánudaginn 26. maí fór fram árleg Unicef Hreyfing í Giljaskóla. Markmiðið er að safna áheitum fyrir að leysa hreyfiþrautir og verkefni. Í ár var safnað fyrir börnum sem búa við stríð. Hægt er að styðja framtakið á https://sofnun.unicef.is/teams/giljaskoli-2025 Í Giljaskóla er starfandi réttindaráð Unicef sem samanstendur að mestu af nemendum skólans á ólíkum aldri en eitt af verkefnum þeirra í vetur var að undirbúa þennan viðburð. Nemendur og starfsfólk tóku vel á því þennan dag, lærðu heilmikið og skemmtu sér einnig vel.

Í matsal skólans fór fram Litla upplestrarkeppnin hjá 4. bekk í gær, 20. maí. Þetta var sérstök stund þar sem ungir lesendur sýndu ótrúlega færni sína í upplestri ljóða og þulna fyrir framan stóran hóp áhorfenda. Nemendur höfðu æft sig af mikilli kostgæfni undanfarna mánuði og það skilaði sér í glæsilegum flutningi. Raddir þeirra bárust skýrt og greinilega um salinn þegar þau fluttu fjölbreytt úrval af íslenskum ljóðum og þulum. Það var augljóst að krakkarnir höfðu lagt mikla vinnu í æfingar og túlkun textanna.

Velferðarsvið og Heilbrigðisstofnun Norðurlands standa fyrir foreldranámskeiðinu Uppeldi sem virkar – færni til framtíðar.

Nú stendur árshátíð Giljaskóla fyrir dyrum. Árshátíðir nemenda verða haldnar í íþróttasal skólans þriðjudaginn 8. apríl, miðvikudaginn 9. apríl og fimmtudaginn 10. apríl kl. 17:00. Aðgangseyrir er 500 krónur fyrir fullorðna og gesti. Nemendur í Giljaskóla og yngri börn borga ekki aðgangseyri. Selt er inn við innganginn í íþróttahúsinu. Það verða posar á staðnum. Aðgangseyrinn skiptist á milli sérdeildar og 1. - 9. bekkja og er nýttur til vorfagnaða. Foreldrasýningar í íþróttasal Giljaskóla verða sem hér segir; Þriðjudagur 8. apríl kl. 17:00 sýning stuttmynda nemenda í 8. - 10. bekk; afrakstur stuttmyndadaga. Miðvikudag 9. apríl kl. 17:00 sýna: Sérdeild, 3. bekkur, 5. bekkur og 7. bekkur. Fimmtudag 10. apríl kl. 17:00 sýna: Sérdeild, 1. bekkur, 2, bekkur, 4. bekkur og 6. bekkur.