Skólasetning Giljaskóla 24. ágúst 2020

Nú er komið að því að hefja skólaárið 2020-2021 og hlökkum við virkilega til að fá krakkana aftur í skólann.

Skólasetning Giljaskóla verður haldin mánudaginn 24. ágúst kl. 10:00. Vegna aðstæðna verður skólasetningin með öðru sniði en venja er og því miður geta foreldrar ekki tekið þátt að þessu sinni en þeir geta fylgst með skólasetningu skólastjóra á slóð sem send verður foreldrum að morgni skólasetningardags. 

Nemendur 2. - 10. bekkjar mæta í sínar heimastofur (sjá neðar) kl. 10:00 og verður skólasetningu skólastjóra varpað á skjá í stofunum. Eftir það fá nemendur upplýsingar um skólastarfið hjá umsjónarkennurum. Gert er ráð fyrir að skólasetningu ljúki í síðasta lagi kl. 11:00. Nemendur 1. bekkjar verða boðaðir í viðtöl hjá umsjónarkennurum 24. og 25. ágúst.

Kennsla hefst samkvæmt stundaskrá þriðjudaginn 25. ágúst hjá 2. - 10. bekk og hjá 1. bekk miðvikudaginn 26. ágúst. Valgreinar á unglingastigi hefjast vikuna eftir. 

Sú breyting er orðin á skipulagi hjá okkur að kennsla hefst kl. 8:10 á morgnana, en skólinn opnar 7:50 og er nemendum velkomið að fá sér hafragraut í matsal í upphafi dags.

Varðandi gestakomur í skólann þurfum við að takmarka þær eins mikið og unnt er. Við tökum þó á móti nýjum nemendum í heimsókn með foreldrum sínum og reynum við þær aðstæður að gæta fyllstu varúðar og sóttvarna. Við mælum með því að umsjónarkennari taki á móti gestum í anddyri og fylgi í stofuna í spjall. Nauðsynlegt að spritta hendur við komuna inn í skólann. Leyfilegt er að ganga um skólann, en sleppa öllum snertingum við sameiginlega snertifleti. Í samtali í stofu er þess óskað að starfsfólk og gestir gæti þess að halda fjarlægðarmörkum.

Hér má sjá yfirlit yfir heimastofur árganga og innganga sem nemendur nota: