Fréttabréf Giljaskóla
2. apríl 2024
Kæra skólasamfélag
Skemmtilegur marsmánuður er nú að baki en þar er væntanlega efst í huga margra afar vel heppnuð árshátíð og þátttaka í stóru upplestrarkeppninni. Nemendur og starfsfólk skólans hefur lagt mikla vinnu í þessa árshátíðardaga og á það miklar þakkir skyldar fyrir gott skipulag, frábæra samvinnu og metnað.
Nú líður að vori þrátt fyrir að apríl mánuður taki á móti okkur með miklum snjó. Miklir snjóhólar eru nú við og í kringum skólann og biðlum við til ykkar að keyra því afar varlega. Við erum að byrja að huga að næsta skólaári og í fréttabréfinu má finna mynd af skóladagatalinu 2024 -2025. Eins verður það birt á heimasíðu skólans. Nemendafjöldi næsta vetrar verður svipaður og nú í vetur. Nú í haust koma um 35 börn 1. bekk en í vor erum við að útskrifa 40 nemendur úr 10. bekk.
Við erum afar spennt að takast á við síðustu mánuði þessa skólaárs og horfum björtum augum til framtíðar með þessu góða skólasamfélagi.
Bestu kveðjur Alla, Ragna og Thelma
Nemendur Giljaskóla í 1. sæti í Lífshlaupinu 💗
Nemendur Giljaskóla voru í fyrsta sæti í Lífshlaupinu í sínum flokki, hreyfing flesta daga.
Skólinn hefur tekið á móti verðlaunum fyrir hönd nemenda en það er skjöldur sem á stendur
,,Lífshlaupið 2024 Flestir dagar 1. sæti".
Verðlaunin verða sett í verðlaunaskápinn á 2. hæð skólans.
Til hamingju kæru nemendur
Árshátíð
Árshátíð Giljaskóla gekk mjög vel þetta árið. Byrjaði hún á stuttmyndadögum hjá unglingastigi og síðan tóku yngri bekkir við í tvo daga með sínar flottu sýningar. Nemendur Giljaskóla eru svo sannarlega hæfileikarík þegar kemur að sköpun, samvinnu, söng og leiklist svo ekki sé talað um búningahönnun og sviðsmynd. Kaffihlaðborð til styrktar ferðalagi 10. bekkjar var afar glæsilegt og metnaðarfullt. Við þökkum ykkur öllum kærlega fyrir komuna og nemendum og kennurum fyrir frábæra skemmtun.
Fréttir frá 5.bekk
Marsmánuður hefur verið fjörugur hjá 5. bekk. Eins og hjá öðrum árgöngum í skólanum þá hefur árshátíðarvinnan verið áberandi í skólastarfinu. Nemendur í 5. bekk byrjuðu á hugmyndavinnu í litlum hópum þar sem skemmtilegar hugmyndir komu fram. Niðurstaðan varð að taka Disney fyrir. Fyrir valinu urðu Tarzan, Encanto, Lion King og Toy Story. Nemendur unnu allskonar verkefni tengd þessu en mesta áherslan var á ritun. Nemendur unnu ýmis ritunarverkefni, til dæmis um atriðið sitt á árshátíðinni og uppáhalds Disney myndina sína. Eftir páska halda nemendur áfram að vinna með þetta þema og munu þeir til dæmis skrifa nýjan endi á uppáhalds Disney myndina sína.
Núvitund í 3. og 5. bekk
Í vetur, eins og undanfarin ár, er núvitundarfræðsla í 3. bekk og 5. bekk. Við getum þjálfað heilann eins og aðra vöðva líkamans. Við fræðumst um þennan frábæra huga okkar sem og fjóra hluta heilans, framheilann, drekann, eyjuna og möndluna og hlutverk hvers hluta fyrir sig. Hugur okkar er svo eins og óþekkur hvolpur sem þarf að sýna þolinmæði og umhyggju meðan við erum að æfa okkur í að leyfa ekki huganum að stjórna heldur ætlum við sjálf að vera við stjórnina. Það erum nefnilega alltaf við sjálf sem höfum val um viðbrögð okkar og framkomu. Við lærum nokkrar aðferðir til að kyrra hugann, nokkrar núvitundaræfingar sem vonandi einhverjir ná að tileinka sér.
Skóladagatal 2024-2025
Skóladagatal Giljaskóla fyrir veturinn 2024-2025 má sjá hér.
Framundan
1. apríl - Annar í páskum.
24. apríl - Árshátíðarball unglingastigs.
25. apríl - Sumardagurinn fyrsti.
Matseðill apríl mánaðar
Hér er matseðill fyrir apríl.