Starfslýsingar

Starfsmenn/starfslýsingar

 

Skólastjóri

Skólastjóri í Giljaskóla er Jón Baldvin Hannesson.   Hann er forstöðumaður skólans, stjórnar honum og mótar og viðheldur menningu hans með tilstyrk starfsmanna skólans. Hann ber ábyrgð á starfi skólans og veitir honum faglega forystu, sér um að skólastarf sé í samræmi við lög, reglugerðir og gildandi aðalnámskrá hverju sinni. Hann ber ábyrgð á stefnumörkun skólans, er ábyrgur fyrir gerð skólanámskrár, fylgist með skipulagi náms og kennslu í skólanum, hefur forystu um þróun og umbætur í starfi skólans. Hann hefur forgöngu um að þróaðar séu aðferðir til innra mats skóla með það að markmiði að bæta árangur skólastarfsins. Á grundvelli þess sér hann um að mótuð sé áætlun um endurmenntun starfs­fólks.  Hann ber ábyrgð á skólavistun, á rekstri skólans í samræmi við samþykkta fjárhagsáætlun, undirbýr fjárhagsáætlun og vinnur í samræmi við hana.  Hann hefur umsjón með skipulagningu sérfræðiþjónustu. Hann hefur forystu um gerð forvarnaáætlunar, hefur forgöngu um samstarf heimilis og skóla, sér um ráðningar starfsfólks og starfsmannahald, kynnir sér störf starfsmanna og veitir lið. Allir skólastjórnendur funda vikulega um málefni skólans.

 

Aðstoðarskólastjóri

Aðstoðarskólastjóri er staðgengill skólastjóra. Hann er faglegur forystumaður innan skólans og tekur ásamt öðrum stjórnendum hans þátt í að móta og viðhalda menningu skólans.   Hann vinnur að skipulagi skólastarfs og fylgist með því að það sé í samræmi við ákvæði Aðalnámskrár grunnskóla og skólanámskrána. Hann tekur þátt í stefnumótun skólans, vinnur ásamt öðrum að gerð skólanámskrár, þróunar- og umbótaáætlunar, endurmenntunaráætlunar, innra mats og stuðlar að virkri þátttöku kennara eftir því sem tilefni gefast. Hann sér um gerð stundaskrár og skipuleggur forfallakennslu. Hann hefur ásamt deildarstjórum forgöngu um að kennarar kynni sér nýjungar á sviði  námsefnis og námsgagna Hann skipuleggur stoðþjónustu skólans ásamt fagstjóra sérkennslu og deildarsjóra sérdeildar.  Hefur yfirumsjón með námsgögnum, annast stjórn námsmats og prófa í skólanum ásamt deildarstjórum.  Hann hefur umsjón með upplýsingaflæði innan skólans, sér um að skólareglur séu endurskoðaðar í samvinnu við deildarstjóra og kennara, fulltrúa nemenda og foreldra og vinnur að lausn agabrota og ágreiningsmála ásamt deildarstjórum.  Hann situr í aðgerðateymi, kennararáði og nemendaverndarráði.  Aðstoðarskólastjóri er Þorgerður J. Guðlaugsdóttir.

 

Deildarstjóri

Deildarstjóri er hluti af stjórnunarteymi skólans hann er tengiliðir kennara og stuðningsfulltrúa við skólastjóra. Deildarstjóri tekur þátt í faglegum ákvörðunum og skipulagi innrastarfs skólans með skólastjórum. Hann situr vikulega stjórnunarfundi með skólastjórum og skipuleggur og stýrir deildarfundum sem haldnir eru í hverri viku.Deildarstjóri tekur á agamálum og fylgist með líðan og félagslegri stöðu nemenda í samvinnu við kennara og foreldra og kemur að skólasókn nemenda.  Hann er hluti af aðgerateymi skólans og tekur þátt í ákvörðunum og aðgerðum.  Deildarstjóri skipuleggur kynningarfundi fyrir foreldra/forráðamenn að hausti, ásamt umsjónarkennurum. Hann hefur umsjón vegna samræmdra prófa ásamt skólastjóra og sérkennara.  Deildarstjóri tekur þátt í skipulagninu á uppákomum og heimsóknum á sínu stigi. Hann kemur  að skipulagningu á vettvangsferðum og ferðalögum. Deildarstjóri eldri deildar sér um og skipuleggur valgreina á unglingastigi. Deildarstjóri eldri deildar er Vala Stefánsdóttir.

 

Kennarar

Kennarar taka virkan þátt í þróun og uppbyggingu á stefnu og sýn skólans.  Kennarar taka að sér stjórnun og útfærslu á ýmsum verkefnum og áherslum í skólastarfinu.  Kennarar eru virkir í útfærslu og eftirfylgni í öllu skólastarfinu  Þeir miðla þekkingu og stuðla að félagslegri mótun. Þeir veita hverjum og einum tækifæri til að afla sér þekkingar og leikni, örva starfsgleði nemenda og frjóa hugsun. Kennarar undirbúa kennslu og kenna í samræmi við markmið Aðalnámskrár, gera áætlun og meta reglubundið nám og starf nemenda.  Þeir fylgjast með ástundun, framkomu og líðan nemenda og hafa forystu um úrbætur reynist þess þörf, jafna ágreining og taka á agamálum.  Þeir fylgjast með aðbúnaði til náms og kennslu og færa dagbækur, nemendaskrár, einkunnabækur og aðrar nauðsynlegar skýrslur.  Kennarar hafa forgöngu um farsælt samstarf heimilis og skóla.

 

Sérkennari

Sérkennari sér um kennslu sem felur í sér breytingar á námsmarkmiðum, námsefni, námsaðstæðum og/eða kennsluaðferðum miðað við það sem öðrum nemendum á sama aldri er boðið upp á. Sérkennari gerir greiningu á námstöðu nemenda og námsáætlun í samstarfi við kennara sem byggir á greiningunni og með hliðsjón af skólanámskrá. Námsáætlun getur tekið til einstaklinga eða hópa og er endurskoðuð með reglulegu millibili. Hann veitir kennurum ráðgjöf varðandi nám, kennslu og námsgögn, aðstoðar kennara við gerð einstaklingsnámskrár fyrir nemendur sem ekki fylgja hefðbundinni áætlun, hefur umsjón með námsgögnum sem tengjast sérkennslu, aflar þeirra eða útbýr gagnasafn. 

 

Starfsmaður í sérdeild

Kennari, þroskaþjálfi eða leikskólakennari með ábyrgð á kennslu, sér um kennslu sem felur í sér breytingar á námsmarkmiðum, námsefni, námsaðstæðum og/eða kennsluaðferðum miðað við það sem öðrum nemendum er boðið upp á og skilgreint er í Aðalnámskrá grunnskóla. Sér um og skipuleggur einstaklingsnámskrá í samræmi við metna þörf nemenda þjálfun og mat á framförum. Hefur forgöngu um samstarf við tengslabekk og foreldrasamstarf. Útbýr kennslugögn og aflar nýrra í gagnabanka.

 

Stuðningsfulltrúi

Stuðningsfulltrúi vinnur eftir einstaklingsnámskrá nemenda eftir leiðsögn umsjónarkennara, sérkennara og aðstoðar nemendur við að ná settum markmiðum. Hann aðlagar verkefni að getu nemandans samkvæmt leiðbeiningum kennara/sérkennara, ýtir undir sjálfstæð vinnubrögð, og styrkir félagsleg tengsl. Hann tekur þátt í undirbúningi og skipulagi kennslunnar eftir þörfum og í samræmi við þann tíma sem skilgreindur er til þess og tekur þátt í fundum um skjólstæðing sinn og sinnir foreldrasamstarfi í samráði við umsjónarkennara.  Sinnir frímínútnagæslu og öðrum verkefnum sem honum eru falin.

 

Skólaliði

Skólaliði er þátttakandi í uppeldisstarfi skólans. Hann aðstoðar m.a. við móttöku nemenda á morgnana, er á frímínútnagæslu, fylgir yngstu börnum í akstri í íþróttir og sund. Fylgir nemendum með sérþarfir eftir við ýmsar aðstæður, aðstoðar í matsal. Er við gæslu og eftirlit á göngum skólans. Vinnur við ræstingar og sinnir ýmsum  öðrum verkefnum í skólastarfinu. 

 

Skólaritari

Skólaritari annast öll almenn skrifstofustörf í skólanum, símavörslu, skiptiborð og innanhússkerfi, tekur við fjarvistartilkynningum og skráir í Mentor.  Hann sér um skráningar og uppgjör vegna Matartorgs og skólavistunar, ennfremur skráningar á ýmis námskeið á vegum Akureyrarbæjar.  Hefur eftirlit með tækjum á skrifstofu, kallar eftir viðgerðarmanni ef þess er þörf og sér um pantanir á pappír o.fl.  Annast innritun og nemendaskrá í skólanum og sér um að hún sé alltaf sem réttust.  Aðstoðar annað starfsfólk við ritvinnslu og fjölföldun eftir því sem þörf er á og aðstæður leyfa hverju sinni.  Skólaritari sinnir nemendum og foreldrum með margvíslegum hætti og leitast við að greiða úr þeim málum sem þeir bera upp við hann hverju sinni.  Skólaritari annast undirbúnings- og frágangsvinnu í Mentor við upphaf og lok skólaárs.  Skólaritari uppfærir heimasíðu skólans.  Skólaritari sinnir einnig öðrum þeim verkefnum sem skólastjóri kann að fela honum.

 

Umsjónarmaður skóla

Umsjónarmaður er verkstjóri og næsti yfirmaður skólaliða og skipuleggur störf þeirra.  Hann fylgist með ástandi húss, muna og lóðar og er tengiliður skólans við FAK.  Annast um smávægilegt viðhald, sér um að hiti, lýsing og loftræsting skólahúsnæðisins sé fullnægjandi og að kerfi þessi starfi rétt.  Hann sér um flokkun og frágang sorps frá skólanum og hreinsun á rusli á skólalóð.  Annast snjómokstur frá dyrum og af tröppum skólans, útvegar sand eða snjómokstur á skólalóð.  Sér um innkaup á hreinlætisáhöldum og þvottaefnum.  Aðstoðar við móttöku og gæslu nemenda á skólatíma.  Sinnir einnig öðrum þeim verkefnum sem skólastjóri kann að fela honum.

 

Matráður

Matráður annast matargerð í mötuneyti. Hann  er verkstjóri aðstoðarfólks í mötuneyti, þegar það á við, sér um gerð matseðla eftir manneldismarkmiðum fyrir hvern mánuð skólaársins og kynnir þá foreldrum, nemendum og starfsfólki skólans.  Sér um innkaup fyrir mötuneyti skólans, fylgist með rekstrarstöðu mötuneytis hjá skólastjóra og leitast við að innkaup og skipulagning séu sem hagkvæmust. Annast daglega ræstingu eldhúss, hefur umsjón með því að tæki og búnaður í eldhúsi starfi eðlilega og lætur umsjónarmann skóla vita ef viðgerða/lagfæringa er þörf. Fylgist með borðbúnaði og öðrum lausamunum í eldhúsi og sér um endurnýjun og innkaup þegar þörf er á.