Giljaskóli

Viðmiðunarstundaskrá

Nemendur í 1. - 4. bekk fá 30 kennslustundir á viku, 5. - 7. bekkur 35 stundir og 8. - 10. bekkur 37 stundir. Í Aðalnámskrá grunnskóla er kveðið á um kennslustundameðaltal á viku í öllum námsgreinum. Í yngri barna kennslu er mælt með því að beitt sé sveigjanlegum kennsluháttum og skólastarfið skipulagt þannig að möguleikar samkennslu og samþættingar nýtist sem best.

Meðal þess sem unnnið er við í valgreinum yngstu bekkja eru listir ýmiskonar og dans í hópastarfi.

Stundaskráin skal vera þannig uppbyggð að möguleiki sé á að þétta eða dreifa kennslu einstakra greina eftir því sem best þykir henta. Það er því nokkuð mismunandi eftir bekkjum hve bundin stundaskráin er en umsjónarkennurum er ætlað að fylgja eftirfarandi viðmiðum.

Í sérdeild er öllum nemendum kennt samkvæmt einstaklingsnámskrá. Fjöldi tíma í hverri námsgrein og val á námsgreinum miðast við einstaklingsþarfir.

Valgreinar

Hver nemandi í 9. og 10. bekk þarf að skila samtals 10 kennslustundum á viku í valgrein. Hver valgrein samsvarar 2 kennslustundum á viku yfir veturinn þannig að hver og einn nemandi þarf að velja 5 greinar. Hluti valgreinanna er kenndur í skólanum en hluti er sameiginlegur með öðrum skólum á Akureyri og kenndur víðs vegar um bæinn. Það sem hefur verið í boði í vetur í sameiginlegu vali milli skóla eru eftirtaldar greinar: Atvinnulífskynning, líkamsrækt,  leiklist – LA, nudd, byrjendanámskeið í forritun, útivistarfræði, Í.T.A –námskeið, djass og dægurlagasöngur heimspeki, framtíðarleiðtogar, handboltaskóli KA,  knattspyrnuskóli Þórs, fjöllist, nytjalist, danskennsla, nýsköpun og táknmál. Hér í skólanum er boðið upp á stærðfræði, íslensku, samfélagsfræði, náttúrufræði, ensku, námsleikni, heimilisfræði,  íþróttafræði, tölvufræði og vélritun, leiklist, myndmennt og fatasaum.

Nemendur eiga kost á að fá metið félagsstarf eða nám utan skólans, en til að það sé metið sem

ein valgrein þarf að liggja að baki a.m.k. 4 klukkustunda iðkun á viku. Nemandi þarf að skila staðfestingu á eyðublaði sem skólinn leggur til, frá þjálfara/kennara/foringja á ástundun í upphafi hvorrar annar og mati á starfinu í lok hvorrar annar. 

Námsmat

Til þess að námsmat sé örvandi og uppbyggjandi þarf að gera nemanda grein fyrir hvar hann stendur sig vel og hvaða námsmarkmið hann hefur tileinkað sér. Námsmat sem hjálp við nám felur m.a. í sér hvatningu frá kennara og uppbyggingu sjálfstrausts en einnig að finna leiðir til úrbóta þegar vandamál steðja að í náminu. Kennari þarf að þekkja nemendur sína vel, vera meðvitaður um ólíka eiginleika hvers og eins og fylgjast með framvindu námsins hjá hverjum nemanda fyrir sig.

Grundvallarþættir við námsmat eru námsárangur, leikni, framfarir, virkni í kennslustundum, hegðun, vinnubrögð og samskipti. Í gegnum daglega vinnu nemenda fær kennarinn mynd af þekkingu þeirra og skráir hjá sér stöðu nemenda. Formlegar athuganir/próf eru hluti af heildarmati á þekkingu nemenda. Við slíkt mat eru hafðir í huga ólíkir möguleikar nemenda t.d. í lestri eða skrift. Nemandi sem á í erfiðleikum með þessa þætti má gera grein fyrir þekkingu sinni á annan hátt.

Nemendur í 4. og 7. bekk taka samræmd próf í íslensku og stærðfræði og fara prófin fram í október. Nemendur í 10. bekk taka samræmd próf í maí. Nemendur eru prófaðir í lestri 5 til 6 sinnum að vetri.

Námsmat í 1. - 4. bekk er gefið í bókstöfum (sjá viðmið um námsmat) en í eldri bekkjum í tölum heilum og hálfum.

Í lok haustannar er formlegt námsmat afhent í öllum bekkjum í öllum bóklegum greinum.

Í 2.-7. bekk er gefin sérstök einkunn fyrir lestur, ritun, málfræði og bókmenntir en í 8.-10. bekk er gefin ein íslenskueinkunn. Í verkgreinum sem nemandi hefur lokið (nemandi stundar hálfan veturinn) er einnig formlegt mat. Í öðrum verkgreinum, íþróttum, sundi og valgreinum í 9. og 10. bekk er gefin umsögn. Á vorönn er formlegt námsmat í öllum greinum sem eru á stundaskrá. Varðandi 1. bekk gilda önnur viðmið. Þar er verið að meta aðra þætti en hjá eldri nemendum og mat að mestu í orðum og umsögnum um almennt gengi í skólanum. Að vori er stefnt að því að meta formlega námsþætti, s.s. lestur og stærðfræði.

Viðmið um námsmat

Samræmd próf

Með samræmdu prófi (sbr. reglugerð nr 414/2000) er átt við sama próf sem nemendum 4., 7. og 10. bekkjar gefst kostur á að þreyta við lok grunnskóla á sama tíma og við sömu eða sambærilegar aðstæður. Samræmdum prófum er ætlað að veita foreldrum, nemendum og kennurum upplýsinar um stöðu nemenda með samanburði við jafnaldra á öllu landinu. Einnig er prófunum ætlað ákveðið hlutverk við mat á skólanum sem stofnun og skólakerfinu í heild.

Allir nemendur í 4. og 7. bekk taka samræmd próf í íslensku og stærðfræði og fara prófin fram í október. Próftími hvors hlutar er að jafnaði 60 mínútur fyrir nemendur í 4. bekk en 70 mínútur fyrir nemendur í 7. bekk. Heimilt er að veita nemendum frávik frá almennum reglum um fyrirlögn samræmdra prófa t.d. lengri próftíma, prófið leyst í tölvu, nemendur sem hafa annað móðurmál en íslensku eiga rétt á að fá fyrirmælin túlkuð, nemendur með lestrarörðugleika eiga rétt á snældu með upplestri þar sem lesinn er upp sá hluti prófsins sem ekki prófar lesskilning og nemendum sem eiga í miklum erfiðleikum með skrift er gefinn kostur á að skila ritunarþáttum á snældu.

Allar undanþágur varðandi frávik verður að sækja um skriflega  með fyrirvara til Námsmatsstofnunar með rökstuðningi og skulu foreldrar og fulltrúi skólans rita undir beiðnina.

Vilji foreldrar skoða úrlausnir barna sinna þurfa  þeir að sækja um slíkt beint til Námsmatsstofnunar og fá þeir send heim ljósrit af prófúrlausnum gegn vægu gjaldi. Beiðnin skal berast skriflega til Námsmatsstofnunar eigi síðar en tveimur vikum eftir að nemanda hefur borist vitnisburðurinn.  Eyðublöð eru aðgengileg á vefsíðu námsmatsstofnunar. Foreldrum gefst kostur á því að ræða við umsjónarkennara um vitnisburðinn úr samræmdu prófunum og skoða tiltæk úrræði í samráði við sérkennara ef þurfa þykir.

Nemendum 10. bekkjargefst kostur á að þreyta samræmd próf í allt að sex námsgreinum sem eru íslenska, stærðfræði, enska, danska, samfélagsfræði og náttúrufræði.  Nemendur í 9. bekk sem að mati skólastjóra og umsjónarkennara hafa staðist þær kröfur sem gerðar eru samkvæmt Aðalnámskrá við lok grunnskóla í einstökum námsgreinum geta með samþykki forsjáraðila valið að þreyta samræmd lokapróf í þeim námsgreinum. Nemendum er óheimilt að þreyta samræmt lokapróf tvisvar í sömu námsgrein. Um inntöku í framhaldsskóla sjá nánar reglugerð nr. 98/2000 um innritun nemenda í framhalds­skóla á heimasíðu menntamálaráðuneytisins.

Námsmatsstofnun getur unnið á margvíslegan hátt úr þeim upplýsingum sem prófin veita og hafa skólar nýtt sér það í æ ríkara mæli til þess að endurmeta vinnubrögð sín.

Viðmið um lestrarfærni.

Raddlestur - hljóðlestur – leshraði

Viðmið skólans um leshraða og lestrarmat er í samræmi við viðmið Fluglæsis sem er stefnumarkandi rit fyrir lestrarkennslu og lestrarmat frá Skólaþjónustu Eyþings, útgefið 1998.

Formlegar viðurkenningar

Í skólanum skal vera starfandi viðurkenningarnefnd. Í henni sitja skólastjóri, aðstoðarskólastjóri og deildarstjórar.  Nefndin fjallar um tillögur sem henni berast og ákveður hverjir hljóta viðurkenningar. Eftirtaldar áherslur eru í veitingum á viðurkenningum fyrir góðan árangur.

·         Lestur hjá 1.-4. bekk

Umsjónarkennari veitir nemanda viðurkenningu þegar hann hefur náð 50 atkv., 100 atkv., 150 atkv. og 200 atkv.

·         4. bekkur

Viðurkenning fyrir framfarir í skólastarfi. Umsjónarkennarar 4. bekkja skila inn tillögum til viðurkenningarnefndar (geta verið fleiri en einn nemandi). Viðurkenningin skal vera árituð sígild bók sem hæfir aldri.

·         7. bekkur

Viðurkenningar fyrir námsárangur í íþróttum, heimilisfræði, smíðum, handmennt, myndmennt og tónmennt. Sérgreinakennari skilar inn tillögum til viðurkenningarnefndar. Veitt eru ein verðlaun fyrir hverja grein, árituð bók, margmiðlunardiskur eða tónlistardiskur sem tengist greininni og hæfir aldri.

Viðurkenningu skal veita fyrir hæstu meðaleinkunn í bóklegum greinum. Umsjónarkennarar skila tillögum til viðurkenningarnefndar og veitt eru ein verðlaun, árituð sígild bók sem hæfir aldri.

·         10. bekkur

Viðurkenningu skal veita fyrir a) mestu framfarir og b) besta námsárangur í íslensku, stærðfræði, ensku, dönsku eða öðrum norðurlandamálum, upplýsinga- og tæknimennt, tölvufræði, ástundun og hegðun. Viðurkenningin skal vera árituð bók eða margmiðlunardiskur sem tengist greininni. Einnig skal veita viðurkenningu fyrir áhuga og virkni í félagsstörfum. Viðurkenningin skal vera listaverk.